GEWOON DEURGOAN!
Op speciaal verzoek van de Kinderachtige Commissie mos ut d’r ok dit joar moar weer van kommen. Een woordjen van de Bielemans in ut programma buuksken van de Hummelse Kermis. Noa een hoop geslijm van die nathalzen met dat gruune rozetje op de borst, kwam uutendelijk de sprekwoordelijke aap uut de mouw: Ut buuksken mot toch op de één of andere manier vol...
D’r is dit joar weer een hoop gebeurd in Hummel. Wi-j zult niet geliek alles bi-j kop en kont pakken, anders loopt wi-j misschien wel iets te veul veuruut op de teksten die de Hummelse notabelen noar de kop geslingerd zult kriegen. Feit is wel dat wi-j allen een andere kermis zult kriegen dan veurig joar. De uutbaters Theo en René van ut Hart van Hummelo hebt de tapkraan an de wilgen gehangen en bunt met de noorderzon vertrokken noar ut hart van Hengelo. Ut ‘Duo Homo Sapiëns Amore’ had zien hielen nog niet gelicht of de oaverbuurman had zien oog al loaten vallen op ut liefdespaleisje van disse twee vakbroeders: “As 100% noazaten van wijlen Oaverste Bernard Rexwinkel mag ut toch niet gebeuren dat wi-j in dit verrabbezakte pandje geen kermis kunt vieren…” En zo zal dan ok geschieden, met de Hummelse Kermis goat wij met zien allen gewoon ‘FF noar Steef’. Klasse! Woensdagsmargens ku-j d’r veurdat de optocht begint zelfs terecht veur een vers gebakken eitje. Steef & Martine hebt ut in ieder geval goed begreppen. De Hummelse Kermis mot GEWOON DEURGOAN!
De likdoorns van de Bielemans begint al weer aardig te jökken bi-j ut naderen van de Hummelse Kermis. Maneger Ni-jman is as DJ Dré begonnen an een wereldtour in de moand augustus um zodoende goed beslagen ten ies te kommen op zondag 5 september veur de afsluuting van de fietstocht. Dan wurt ut dus niet effen noar Steef, moar een hele poos noar Steef. Japh hef zich veur een talencursus teruggetrokken bi-j de nonnen in het klooster van Vught um zodoende nog scherper veur de dag te kommen met de teksten op de woensdagmorgen. De notabelen kunt zich alvast achter de oren goan krabben. Henkie G. geet begin september nog een paar dagen in retraite veur een cursus ‘Mantras zingen’. Hi-j mot weer met zien eigen geest in het reine kommen, zodat hi-j op de woensdagoavond niet opni-j as een huulende brulkikker moederziel alleen op de veranda bi-j de Krint belandt. Veurig joar vierden wi-j ut heugelijke gegeven dat Henkie G. 20 joar in functie was as Bieleman en dat trok ‘m de traanbuisjes helemoal leug. Disse ‘Piet Bartels van Hummel’ wet gelukkig niet van uutschei-jen en dat is moar goed ok. GEWOON DEURGOAN!
Ut zol Hummel sieren as iedereen ‘ns een veurbeeld nam an Henkie G. en Steef & Martine. I-j kunt wel as een verschrompelde noar lucht snakkende walrus thuus in ow eigen kribbe goan liggen zweiten op de woensdagoavond, moar dan sloa-j de plank toch echt goed mis. Veur da-j ut wet stoa-j alweer an de pitband bi-j de Aviko um de zwarte stukken uut de jappels te sni-jen, stoek i-j met de trekker weer plankgas oaver ut land um de maïs d’r af te knetteren, bu-j de rooie cijfertjes van ut laatste kwartaal an ut wegwerken etc. Moar dan bu-j te laat, stroezerd! Trek ow niks an van dichtvallende oogleden, ut proaten met dubbele tong, koortsanvallen in ut holst van de nacht, acute incontinentie of andere nauwelijks te verkloaren kwoaltjes. Niet klagen, moar jagen! Dit joar stoaw op de woensdagoavond weer te bateren in de zaal bi-j de Krint en hef heel Hummel moar één motto: GEWOON DEURGOAN!
Namens de Bielemans,
Erik ‘Japh’ Dreteler
PS: Ideeën veur de Hummelse Kermis ku-j deurgeven an Gert-Jan Bos, veurzitter van de Kinderachtige Commissie.
