D’r wean of d’r niet wean, dat is de vroag!
Ok in 2009 is ons as Bielemans deur de Kinderachtige Commissie de grote eer gegund um ons licht te loaten schienen op de kommende Hummelse Kermis en alles wat doar met te maken hef. Zo’n prestigieus buutenkansje loaten wi-j ons natuurlijk niet ontglippen, al was ut alleen moar um potentiële sponsors te wiezen op het zwoare financiële weer woar ut geesten-verjagers-trio momenteel in verkeert...
Veurdat wi-j dieper op de kredietcrisis der Bielemans in wilt goan, wilt wi-j eerst nog effen een historische anekdote met een hedendaagse moraal optekenen:
Toen de Engelsman Willem Schudspier honderden joaren geleejen in zien kribbetjen van stro lei te zweiten en zich de radioactieve zwarte rook van zien bi-jna leuge olielamp volgas deur de neusgaten jaagde, toen zat den stieve Britse boavenlip een betjen hardop te mijmeren oaver de essentie van ut leaven. Plotsklaps begrep hi-j ut, sprong ‘wild begeesterd’ uut de bedstee, nam zien fazantenhanenveertje ter hand en schreef een legendarische strijdkreet op de achterkant van een verdwaald papaverblad: “D’r wean of d’r niet wean, dat is de vroag!”
Veur de Bielemans was ut veurig joar bi-jnoa d’r niet wean (moar vanzelfsprekkend wel d’r wean!). Wi-j schrieven moandagoavond 8 september 2008. Met nog moar twee dagen te goan veurdat de bolide van de drie Musketiers de stroaten van ut Hummelse derp onveilig mot goan maken, mos eerst de muziekinstallatie nog effen an een stevige test onderworpen worden. De aggregaat wier angetrapt, installatie ingeplugd en voilà, de decibellen knapten met windkracht 10 langs onze uuterst aantrekkelijke smoeltjes. “Zo, wi-j bunt d’r kloar veur”, dachten Maneger Ni-jman en Japh. Nummer drie, Henkie G. dacht doar toch iets anders oaver en dit electronisch lichtpunt stak nog effen gauw de stekker van een aftandse rookmachine d’r bi-j in... Op de onderbokse noa ging alles in één keer uut en wier ut angstvallig stil in de werkplaats bi-j Herman en Rikie. En toen de rekkening kwam van 900 euro veur ni-je speakers wier ut nog veule stiller...
Stil zal ut dit joar hoe dan ok niet worden met de Hummelse Kermis. Ondanks de tegenslag van 2008 bunt de Bielemans samen met de Kermiscommissie en de uutbaters van de Hummelse horeca zich hard goan maken veur ut muzikale programma bi-j ut Hart en de Krint dit joar en dit oaverleg hef zien vruchten afgeworpen! Tjonge, jonge, jonge, wat zal ut d’r dit joar heer goan in beide etablissementen:
- Noa de fietstocht zal nota bene Maneger Ni-jman zelf as zien alter-ego DJ Dré bi-j ut Hart de spits afbieten en doar zult op zondag de kromgetrokken golfplaten van pure vreugde zo van ut dak af kommen fluiten. Asbestsaneren? DJ Dré telefoneren!
- Op de moandagoavond, ok weer bi-j ut Hart, zal ut ‘Vogel Wegbrengen’ gebeuren met de drie superdwaze heren van de Loco Loco Disco Show, disse mafketels meugen jullie ècht niet missen!
- De Engelse band Fragment zal dinsdagsoavonds ut podium bi-j de Krint beklimmen en de zaal ‘totally crazy’ maken. Roep moar tegen disse drie maffe Engelsen wat i-j wilt heuren. Van AC/DC töt Jan Smit, geen enkel probleem. ‘Let’s Party!’.
- Dinsdag- en woensdagmiddag noa de optocht en op woensdagoavond bi-j ut Hart geet Blinde Ed op de tast de brailletoetsen van zien orgeltje zuuken en d’r een alderjekers feest van maken veur iedereen, ok veur slechtheurenden en bi-jzienden. 100% gegarandeerd!
Dus:
D’R WEAN OF NIET D’R WEAN, DAT IS DE VROAG!
Namens de Bielemans,
Erik ‘JAPH’ Dreteler
PS: Heb i-j een mirakels idee veur de Hummelse Kermis geeft ut dan deur!
Veur meer info: Gert-Jan Bos, veurzitter Kinderachtige Commissie
